E Tunjariko sas atunči kerdjilas, kana e Nikolić familia -e Ruža aj lako rom o Mišo aj lenge duj anglune šave- tradenas ando motori aj penga cerhasa to bitjinkeren colura. Ando Njamcicko Them phirkernas jekha kelderarickone gruposa, so jekh romano grupoj kaj si len specializacia te keren butji xarkomasa. E Ruža aj o Mišo bešenas ande pengi cerha ando tunjariko, delas o brišind, aj le karavonongo udud sa phabonas krujal lende. Sa le aver maj komfortabilo sas, feri von sas kodol so bešenas ande cerha. Dikhle avri ando tunjariko, la Ruža o cino sas la ande vast, o Mišo las o gitare peste aj e melodia la gjilaki Tunjariko sas lokes vazdjilas. E vorbi vazdjon pe le brišindesko motivo. Asvenca ande penge jakha von angluni data line opre e gjili vorta po than.

Ande jekh interju so kerdas lenca e Christa Stippinger ando 1993, e gjilabatorka serela pe kodi vrama:

“Phirkerasas pa jekh foro po kaver le kelderarenca ando Njamco le colonca. Savoren lendar sas len karavani feri ame samas ande cerhate. Sako rat ratjarasas pe le kamposki vatra. Jokhar delas o brišind aj muri šori inke cinoni sas. Inke dos (davas) la čuči. Muro ilo kade dukhalas ma ke dikhos ke von šaj tjiravenas penge vareso tato ando karavano aj ke vi šuko sas. Gindijas ma ke ame sam maškar lende e maj gere.”