"E Tu gelant-tar a lumasa jekh nevi gjili. Kacave kreativno butja butivar hatjaraven o hango le pop gjilango vaj e telune amerikake melodijango, feri numaj unjivar si žanimastar sar intrego hasnime aj boldine pe romani šib. Individualni kotora la melodiake vaj maj lungi kotora ašile ande la Ružaki aj le Mišoski memoria, aj so fajas le lenge, kodolendar kerde neve gjila. Me simas tanuvo (svedoko) te dikhav sar kerdjile maj but gjila kodolendar. Kado jekh zurales kreativno proceso si, aj e Ruža aj lako rom čudimasa phandadjon jekhaveresa. Jekh lendar e melodia donginel (kerel hum), o Mišo lel te bašavel la po gitari aj kerel vi vorbi lendar. Naj but te lel pe, aj e angluni strofa aba vi gataj. O Mišo normalno iskirij (ramol) tele e končarde vorbi, e Ruža gjinel le unjivar aj paruvel le ande pesko dialekto. V’el duj butivar lungo vrama den duma pa vorbi. E melodia naj te iskirij pe tele, ke la Ružaki mužikaki memoria zurales barij. E Tu gelan-tar a lumasa karing 20 berš palpale sas iskirime (karing 1974) ande jekh kreativno kolaboracia maškar e Ruža aj o Mišo, kaj bitevedimasko (biathajimasko) ašundjol o glaso jekha pinžarde ungriko melodiako. Phenel pe ke katja gjili vazdjol pe jekh čačikano pecipe.”