Originalno o himno ande phurani Yugoslavia sas pinžardo (specialno perdal o filmo Skupljači perja de anda 1967). E gjili Gelem, gelem sas deklaruime sar le romengo himno po angluno lumako kongreso ando 1971 so maj palal bušolas International Romani Union. Datunčara e gjili kerdjilas jekh politikako simbolo ando romano miškipe aj šaj ašundjol pe sako formalno pecipe ande Austria.

E Petra Gelbart dikhel o romano himno aj leske aver falo verziji sar e “averšandimasko mikrokozmos” (microcosm of diversity).

Ande publikacia Die andere Hymne e etnomuzikolokinja Ursula Hemetek phenel pa e gjili Gelem, gelem, ke si sar “o maškarthemutno himno le ‘phirutne’ manušengo”, aj sikavel vi e bimalajimata e himnonge tradicionalne hatjarimatange: so zurales šaj avel internacionalno jekh himno, so trubulas te avel o simbolo jekha naciako, aj ke sar šaj jekh narodo, kaj naj les phuv, šaj avel jekh nacia? O romano himno Gelem, gelem šaj hatjardjol kade, kana e khetanutni identiteta, historia aj avindipe šon pe anglal. E Gelem, gelem na numaj ande jekh verzia si, ale ande but verziji, aj le rom gjilaben la pe sa e luma. Aj kade e gjili šaj hatjardjol vi sar e averšandimasko himno.

E Ruža Nikolić Lakatos phenel o himno Gelem, gelem ande le lovarengo gjilabimasko štilo. E bazaki melodia daba si kaver khatar le himnoske aver verziji, ale voj gjilabel e verzia le vorbengi khatar pesko rom, o Mišo Nikolić. Anda kodo si kado relevantno, ke pa le romengi historia del duma aj ke šindjon anda India. O himno butivar e malajimasko punkto sas te keren mužika khetanes avere bandanca ande jekh etnikaki grupa, na primer le Pera Petrovićesa aj le Pišti Horvathesa.